教學流程 · 學生交功課
由 WhatsApp 傳檔，到登入、派功課、交功課可逐項驗收
4 月 Blog 同主站各自上線之後，5 月中旬我先起一個獨立交功課站：唔係當時已有學生等緊用，而係為將來交功課流程舖路，唔好再長期靠 WhatsApp 收檔。
第一版刻意收窄做最小完整流程：學生登入、睇到作業、交一份（當時以文字為主）、老師睇到列表；檔案上傳、電郵通知、WhatsApp 自動提醒留到之後先加。
遇到嘅問題：WhatsApp 方便，但難以當正式流程
傳檔快，但對教學方同學生都有隱藏成本：檔案散喺對話、難對返邊份係邊個作業、改期同重交冇統一記錄，亦唔易做權限（邊個係老師、邊個只係學生）。
- 冇固定「作業列表」：學生要靠記憶或截圖對返截止日。
- 冇角色分開：老師後台同學生頁面混喺同一套臨時做法好易出錯。
- 同 Blog、主站混做一個專案：一改登入或資料庫，靜態出文同 LP 可能被拖死。
解法：Plan 寫清規格，再開獨立專案砌最小閉環
交功課站涉及登入、資料庫同權限，我唔係一開波就叫 AI 寫 code，而係先用 Cursor Plan 模式同佢對：登入點做、老師同學生點分、資料庫要邊幾張表、第一版刻意唔做乜。Plan 完先寫專案說明同驗收表，先至開 GitHub 專案同起骨架。
- 分開專案：Blog、主頁、禮品頁各自 deploy；交功課站另開 repo，兩邊改動唔互拖。
- 講明「今次唔做」：每次對話寫清唔做上傳、唔做通知、唔做大規模改 UI；估計八成走偏係冇鎖範圍。
- 用案例驗收：例如「老師提交新作業 → 換另一個瀏覽器開學生帳見到標題」，逐項打勾，唔用「整個學習管理系統」做目標。
最小完整流程（第一版要有價值嘅四步）
- 登入／登出正常（Google 或電郵連結登入）；登出後再開學生頁會被導去登入頁。
- 老師派功課：填標題、截止日並提交；後台列表見到新作業。
- 學生交功課：登入後見到作業並交一份（第一版以文字為主）。
- 老師睇繳交列表：同一作業底下見到學生已交記錄。
另有五項上線前檢查（學生可交、老師可派、學生打唔開老師頁、登入過期會跳返登入、同一帳號唔會變兩個人）；每次改登入或權限相關功能都會再跑。
部署踩坑：靜態用 Pages，要登入同 API 用 Workers
第二日我曾用 Pages 去加交功課子網域，花咗好耐先醒起：要 session 同 API 嘅站應該行 Workers 線（Astro on Cloudflare adapter），唔係再犯 Blog 靜態站嗰個錯。之後我寫死分工：內容站用 Pages；要 API／session 用 Workers。
本機預覽亦有一課：唔好同時開兩個預覽埠，cookie 會去錯站，好易誤以為「登入壞咗」其實只係開錯網址。
結果：醜但真係上線，流程可持續加功能
老師派、學生交、列表對到，唔再只靠對話記錄。
交功課站同 Blog 分 repo，deploy 同改文唔互拖。
上傳、人機驗證、電郵、WhatsApp 按優先逐項接上。
範圍：第一版做咗乜、留咗乜
第一版（最小完整流程）
- 登入、角色（學生／老師）、擋老師專用頁。
- 派功課、交功課（文字）、老師繳交列表。
- 獨立專案、本機同正式網址驗收習慣。
之後先加（唔阻第一版上線）
- 檔案上傳同雲端儲存下載權限。
- 人機驗證、Magic Link、作業通知電郵。
- WhatsApp 範本通知（沙盒通關後再接正式號）。
- 批改分數、Markdown 說明消毒、資料庫查詢安全習慣。
可複製條件
- 你已有學生，但交功課仍靠 WhatsApp 或 Email 附件，想逐步攞返喺自己手度。
- 你接受第一版只做「登入 → 派 → 交 → 列表」，唔一次做晒 SaaS 功能表。
- 你願意將動態站同靜態 Blog／LP 分開專案，減少 deploy 互相影響。
- 你願意用 checklist 驗收，而唔只靠「AI 話寫好咗」。
延伸閱讀（Blog 連載同專題）
以下文章記錄同一條線嘅做法同取捨，案例頁只摘重點：
你都想把交功課由對話，變成可驗收流程？
可以先鎖定最小完整流程同五項上線前檢查；檔案、通知同進階權限可以跟住排期加，唔使等「完美 SaaS」先動工。
預約 30 分鐘診斷：幫你定第一版要做邊幾步、邊啲可以遲啲先加。